د کورنیو چارو وزارت د سوق او ادارې په مرکز کې د کورنیو چارو د وزیر محمدمسعود اندرابي په مشرۍ د ۳۴ ولایتونو د امنیه قوماندانانو او مرکزي قطعو سره ویډیو کنفرانس غونډه ترسره شوه.
په دې غونډه کې د ولایتونو امنیه قوماندانانو د امنیتي، لوژېستیکي او همداراز د امنیتي میثاق د تطبیق په برخو کې د ترسره شویو چارو او شته ننګونو راپورونه د کورنیو چارو وزیر ته وړاندې کړل.
محمدمسعود اندرابي د راپورونو او ننګونو تر اورېدو وروسته د امنیتي میثاق پر تطبیق او همدارنګه د خدمتي پولیسو منسوبینو پر ټولولو، د پولیسو منسوبینو د معاشاتو د ورکړې لړۍ په چټکېدو او په مرکز او ولایتونو کې د تورنو کسانو پر نیولو هم ټینګار وکړ.
د کورنیو چارو وزیر په یاده غونډه کې وویل، چې امنیتي میثاق یو مناسب فرصت دی څو ښاریان د قانون د تنفیذ او د امنیت د ټینګښت په برخو کې په مستقیمه توګه دخیل شي.
د کورنیو چارو وزیر همدارنګه ټینګار وکړ چې د ولایتونو امنیه قوماندانۍ باید د څارنوالۍ د قرار د تعقیب او تطبیق په برخو کې هم خپلې چارې ګړندۍ کړي او د هر زورواکي او قانون ماتوونکي پر وړاندې جدي قانوني چلند ترسره کړي.